काठमाण्डौ – बाजुराको बुढीगङ्गा नगरपालिका–६ स्थित बाम्का बजारमा शुक्रबार दिउँसो एक होटलमा ग्यास सिलिण्डर विस्फोट हुँदा भयावह आगलागी भयो, जसले साँझसम्म बजारको ठूलो भाग खरानी बनायो। दमकलको अभाव र तीव्र हावाहुरीका कारण आगो नियन्त्रणमा कठिनाइ भयो भन्ने जानकारी नगर प्रमुख रामबहादुर बानियाँले दिनुभयो।
सिलिण्डर विस्फोटबाट सुरु भएको आगोले झन्डै ४० पसलहरू पूर्णरूपमा जलेर नष्ट भएका छन् भने विस्थापित परिवारहरू छिमेकीको शरणमा बस्न बाध्य भएका छन्। आगलागीपछि इन्टरनेट सेवा र विद्युत् आपूर्ति पनि अवरुद्ध भएको छ।
स्थानीय तह, राजनीतिक दल र सरोकारवालाहरूको आपत्कालीन बैठकले पीडितको यथासक्य विवरण संकलन गर्ने, राहत तथा क्षतिपूर्तिको व्यवस्था गर्न संघ, प्रदेश र अन्य संस्थासँग समन्वय गर्ने निर्णय गरेको छ। साथै, पीडितलाई ‘एकद्वार प्रणाली’मार्फत राहत वितरण गरिनेछ।
