काठमाडौं – सुरक्षण मुद्रण केन्द्रको उपकरण खरिद प्रकरणमा विशेष अदालतले पूर्व कार्यकारी निर्देशक विकल पौडेललाई भ्रष्टाचारको गम्भीर दोषी ठहर गर्दै कैद तथा ठूलो धनराशिको जरिवाना फैसला सुनाएको छ।
अदालतको अध्यक्षता टेकनारायण कुँवरले गर्दै सदस्य तेजनारायण सिंह राई तथा रामबहादुर थापासहितको संयुक्त इजलासले पौडेललाई १ वर्ष ६ महिना कैदसहित १३ करोड ५८ लाख रुपैयाँभन्दा बढी जरिवाना तिराउने फैसला सुनाएको हो। कार्यकारी भूमिकाको जिम्मेवारीमा रहँदा गरिएको अपराध भएकाले उनलाई थप ६ महिनाको कैद सजाय समेत तोकिएको छ।
मुद्रण मेशिन आपूर्ति गर्ने म्याक्स इन्टरनेशनल प्रालि र त्यसका सीईओ अकबर हुसेनलाई समेत अदालतले दोषी ठहर गरेको छ। अदालतले हुसेनलाई डेढ वर्ष कैद सजाय र बराबरको रकम जरिवाना गरेको छ।
साथै, पौडेल, म्याक्स इन्टरनेशनल र हुसेनले जनही ५४ लाख ३४ हजार रुपैयाँभन्दा बढी रकम पीडित राहत कोषमा जम्मा गर्नुपर्ने आदेश पनि अदालतको फैसलामा उल्लेख छ।
यता, अन्य प्रतिवादीहरू सफल श्रेष्ठ, नवीनकुमार पोखरेल, हरिवल्लभ घिमिरे र खड्कबहादुर थापा भने निर्दोष ठहरिँदै मुद्दाबाट मुक्त भएका छन्।
