काठमाण्डौ – इण्डियन प्रिमियर लिग (आईपीएल) क्रिकेटमा गुजरात टाइटन्सले आफ्नो पहिलो जित निकालेको छ। हिजो अहमदावादमा भएको रोमाञ्चक खेलमा गुजरातले मुम्बई इण्डियन्सलाई ३६ रनको अन्तरले पराजित गर्यो।
गुजरातले दिएको १९७ रनको लक्ष्य पछ्याउँदै मुम्बई २० ओभरमा ६ विकेट गुमाएर १६० रन मात्र बनाउन सक्यो। मुम्बईका सूर्यकुमार यादवले ४८ रन बनाएर सबैभन्दा उत्कृष्ट प्रदर्शन गरे, तर टोलीलाई जित दिलाउन सकेन। गुजरातका मोहम्मद सिराज र प्रसिद्ध कृष्णाले समान दुई-दुई विकेट लिए, जसले मुम्बईको विकेट गिराउन महत्त्वपूर्ण भूमिका खेल्यो।
त्यसअघि, टस हारेर पहिले ब्याटिङ गरेको गुजरातले २० ओभरमा ८ विकेट गुमाउँदै १९६ रन बनाएको थियो। गुजरातका साई सुदर्शनले ६३ रन बनाउँदै टोलीलाई राम्रो स्कोर बनाउन मद्दत गरे। मुम्बईका कप्तान हार्दिक पाण्ड्याले दुई विकेट लिए, तर टोलीको जितमा योगदान पुर्याउन सकेनन्।
यो जितसँगै गुजरात टाइटन्सले आईपीएल २०२५ को दोस्रो खेलमा पहिलो जित निकालेको हो भने मुम्बई इण्डियन्सको यो लगातार दोस्रो हार हो।
आईपीएलको आजको खेल तालिका अनुसार, दिउँसो पौने ४ बजे दिल्ली क्यापिटल्स र सनराईजर्स हैदरावादको खेल हुनेछ भने बेलुका पौने ८ बजे राजस्थान रोयल्स र चेन्नई सुपर किङ्ग्सबीच प्रतिस्पर्धा हुनेछ।
