आज भदौ कृष्ण औँसीको पावन अवसरमा सनातन धर्मावलम्बीहरूले कुशे औँसी पर्व श्रद्धाका साथ मनाइरहेका छन्। वैदिक मान्यतानुसार, आज उखेलिएको कुश वर्षभरि देवकार्य र पितृकार्यमा उपयोग गर्न मिल्ने भएकाले बिहानैदेखि ब्राह्मण पुरोहितमार्फत विधिपूर्वक पूजा गरी कुश उखेलेर घर–घर पुर्याउने परम्परा निर्वाह गरिँदैछ। धार्मिक विश्वासअनुसार शुद्ध कुश घरमा राख्नाले पारिवारिक समृद्धि, स्वास्थ्य र धार्मिक लाभ मिल्ने मान्यता रहेको छ।
यसै दिन, सन्तानहरूले बाबुप्रतिको आदरभाव प्रकट गर्दै मनपर्ने भोजन र मिठाइ अर्पण गर्छन् भने दिवङ्गत बाबुका नाममा विभिन्न तीर्थस्थलहरूमा पुगेर तर्पण, श्राद्ध र पिण्डदान गरिन्छ। विशेषतः काठमाण्डौको गोकर्णेश्वर मन्दिर परिसर र बेत्रावती क्षेत्र आज श्रद्धालुहरूको भीडले भरिने गर्दछन्, जसले आजको औँसीलाई धार्मिक तथा सांस्कृतिक दृष्टिले अझ महत्वपूर्ण बनाएको छ।
