गाजामा चलिरहेको युद्धका बीच मानवीय अवस्था दिनानुदिन भयावह बन्दै गएको छ। युरोपेली युनियन (ईयू) का परराष्ट्र मन्त्रीहरूले संकट समाधानका लागि आवश्यक रणनीतिहरूमा छलफल गरिरहेका छन्, यद्यपि इजरायलविरुद्ध कुनै ठोस कारबाहीबारे निर्णय गर्न अझै उनीहरू एकमत हुन सकेका छैनन्।
ईयू विदेश नीति प्रमुख काया काल्लासले इजरायलले मानवअधिकारसम्बन्धी सम्झौताको उल्लङ्घन गरेको भन्दै १० बुँदे कारबाही प्रस्ताव अघि सारिन्। यसमा द्विपक्षीय सम्झौता निलम्बनदेखि इजरायली नेतामाथि यात्रा प्रतिबन्ध, हतियार आपूर्तिमा रोक, र व्यापार सम्बन्ध सीमित गर्ने जस्ता विकल्प समावेश छन्। तर सदस्य राष्ट्रहरूबीच देखिएको नीतिगत भिन्नताका कारण ती प्रस्ताव कार्यान्वयनको चरणमा पुग्न सकेका छैनन्।
गाजामा करिब २० लाख मानिस कठोर मानवीय संकटमा परेका छन्। इजरायलले हमास विरुद्धको आक्रमणलाई आधार बनाएर मानवीय सहायता प्रवाह अत्यन्तै सीमित बनाएको छ।
यो युद्ध २०२३ को अक्टोबर ७ मा हमासले इजरायलमा गरेको आक्रमणपछि सुरु भएको थियो, जसमा १,२१९ जनाको मृत्यु भएको थियो, तीमध्ये धेरैजसो सर्वसाधारण थिए। हमासद्वारा अपहरण गरिएका २५१ जनामध्ये अझै ४९ जना गाजामै छन्, जसमध्ये २७ जनालाई इजरायली सेनाले मृत घोषणा गरिसकेको छ।
गाजाको स्वास्थ्य मन्त्रालयका अनुसार, हालसम्म इजरायली आक्रमणमा परी ५८,३८६ भन्दा बढी प्यालेस्टिनीको मृत्यु भइसकेको छ।
