काठमाण्डौ – आज देशका विभिन्न भागहरूमा मौसमी गतिविधि सक्रिय देखिएको छ, विशेष गरी पहाडी भूभागहरूमा हल्कादेखि मध्यम वर्षा हुने संकेत देखिएको छ। जल तथा मौसम पूर्वानुमान महाशाखाका अनुसार सुदूरपश्चिम, कर्णाली, लुम्बिनी र गण्डकी प्रदेशका केही पहाडी क्षेत्रमा मेघगर्जन, चट्याङ्गसहित पानी पर्न सक्नेछ। कोशी र बागमती प्रदेशका उच्च भू–भागहरूमा पनि हल्का वर्षा सम्भावित देखिएको छ।
मौसमविद् डेभिड ढकालका अनुसार काठमाडौँ उपत्यकामा दिउँसोतिर छिटपुट पानी पर्ने संकेत छ। मधेस प्रदेशका केही स्थानमा भने आज हावाहुरी चल्न सक्ने सम्भावना रहेको जनाइएको छ, जुन बढ्दो गर्मीको असर पनि हो।
भैरहवामा हिजो ४१.५ डिग्री सेल्सियस तापक्रम मापन गरिएको थियो, जुन आज केही घट्न सक्ने अनुमान गरिएको छ। काठमाडौँमा तापक्रम ३० देखि ३२ डिग्रीसम्म रहन सक्ने प्रक्षेपण गरिएको छ। यसका साथै, उच्च हिमाली क्षेत्रमा आज हल्का हिमपातको संकेत पनि दिइएको छ। मौसम परिवर्तनको पछाडि हाल सक्रिय पश्चिमी वायु, स्थानीय प्रणाली र अरब सागरबाट भित्रिएको आर्द्रतायुक्त हावाको प्रभाव रहेको महाशाखाले जनाएको छ।
