राष्ट्रिय स्वतन्त्र पार्टी (रास्वपा) ले आफ्नै पार्टी नेतृत्वको सरकारलाई हालैका पत्रकार पक्राउ तथा थुना प्रकरणमा निष्पक्ष अनुसन्धान गर्न र दोषीमाथि कारबाही गर्न निर्देशन दिएको छ।
कात्तिक १४ गते बानस्थलीस्थित पार्टी कार्यालयमा भएको सचिवालय बैठकले प्रहरीको पत्रकारविरुद्धको कारबाही गलत भएको निष्कर्ष निकाल्दै सरकारलाई ढिलाइ नगरी अनुसन्धान गर्न निर्देशन दिएको हो। प्रवक्ता जगदीश खरेलले सरकारले कानुनी शासन, न्याय, मानव अधिकार र सामाजिक लोकतन्त्रको सम्मान गर्नुपर्ने बताए। पत्रकारलाई लेखन वा समाचार प्रकाशनकै आधारमा पक्राउ, निशाना वा प्रतिबन्ध नलगाउन पनि निर्देशन दिइएको छ।
बैठकले न्यायपालिका सुधारबारे पनि छलफल गर्दै न्याय प्रणाली पुनर्संरचना र न्याय प्रवाहसम्बन्धी विषय संसदमार्फत सम्बोधन गर्ने निर्णय गरेको छ। संसदीय दललाई शक्ति पृथकीकरणको सिद्धान्त सम्मान गर्दै आवश्यक प्रक्रिया सुरु गर्न निर्देशन दिइएको छ। विवादास्पद न्यायाधीशमाथि महाभियोगबारे खरेलले संसदीय दलसम्म औपचारिक रूपमा आएपछि मात्र निर्णय हुने बताए।
