मोरङ – कोशी प्रदेश सरकारले हालै आयोजना गरेको कोशी प्रदेश लगानी सम्मेलन २०२५ मा एक खर्ब ५२ अर्ब १६ करोड रुपैयाँका विभिन्न परियोजनाहरूको लागि सम्झौतामा हस्ताक्षर भएको छ। सम्मेलनको समापन समारोहमा ४६ वटा परियोजनाहरूका लागि सहमतिपत्रमा हस्ताक्षर गरिएको हो।
मुख्यमन्त्री हिक्मतकुमार कार्कीको उपस्थितिमा सम्पन्न कार्यक्रममा प्रदेश लगानी प्राधिकरणका प्रमुख कार्यकारी निर्देशक डा. सरोज कोइराला र लगानीकर्ताहरूबीच सम्झौतामा हस्ताक्षर गरिएको जानकारी प्राप्त भएको छ।
लगानी सम्मेलनमा कृषि, ऊर्जा, उद्योग, पूर्वाधार, सूचना प्रविधि, पर्यटन, र फोहरमैला व्यवस्थापनका परियोजनाहरू समावेश थिए। यस सम्मेलनमा निजी र सार्वजनिक–निजी साझेदारीका ४६ परियोजनाहरूका लागि सहमतिपत्रमा हस्ताक्षर भएको हो।
मुख्यमन्त्री कार्कीले नयाँ युगको आरम्भको रुपमा सम्मेलनलाई हेरिदै, नेपालको आर्थिक र पर्यटकीय विकासमा यसका योगदानको महत्त्वपूर्ण प्रारम्भ भएको बताउनुभयो।
सम्पूर्ण प्रदेशमा लगानीमैत्री कानूनी संरचना निर्माण गर्ने र प्रदेश र संघीय नीतिहरूको बाधा हटाउने कुरा पनि मुख्यमन्त्री कार्कीले आफ्नो भाषणमा उल्लेख गर्नुभएको थियो।
सम्मेलनमा चिनियाँ र गैरआवासीय नेपाली लगानीकर्ताहरूले पनि कोशी प्रदेशमा लगानीको राम्रो अवसर रहेको भन्दै विश्वास र समर्पणका साथ लगानी गर्न आग्रह गरेका छन्।
