काठमाडौँ – विश्वकप विजेता तथा ब्राजिलका लेजेन्ड फुटबलर रोबर्टो कार्लोस आज काठमाडौं ओर्लिँदै छन्। यसअघि शुक्रबार आउने तयारी भए पनि स्वास्थ्य समस्याका कारण उनको भ्रमण स्थगित गरिएको थियो।
उनको आगमन नेपालमा जारी नेपाल सुपर लिग (NSL) फुटबल प्रतियोगिताको विशेष अतिथि स्वरूप हो। आयोजकका अनुसार कार्लोसले भोलि त्रिपुरेश्वरस्थित दशरथ रंगशालामा हुने दोस्रो क्वालिफायर खेल प्रत्यक्ष अवलोकन गर्नेछन्।
उक्त खेलमा पोखरा थन्डर्स र धनगढी एफसीबीच फाइनल प्रवेशका लागि प्रतिस्पर्धा हुनेछ, जहाँ ललितपुर सिटी क्लब पहिल्यै फाइनलमा स्थान सुरक्षित गरिसकेको छ।
फुटबल मात्र होइन, कार्लोसको उपस्थितिले मनोरञ्जन क्षेत्र पनि चम्किनेछ, किनभने उनी आज राति ठमेलस्थित एलओडी क्लबमा विशेष कार्यक्रममा सहभागी हुने तय भएको छ।
सन् २००२ मा ब्राजिललाई विश्वकप जिताउन महत्वपूर्ण भूमिका खेलेका कार्लोसले आफ्नो अन्तर्राष्ट्रिय करिअरमा १२५ खेल खेल्दै ११ गोल गरेका थिए भने क्लब फुटबलमा उनले ७५६ खेल खेल्दै ९७ गोल गरेका थिए।
