काठमाडौँ – विक्रम संवत् २०८२ को पहिलो दिन, नयाँ वर्षको स्वागत केही स्थानमा बादल र वर्षासँग हुने देखिएको छ। मौसम पूर्वानुमान महाशाखाले आज देशका विभिन्न भागमा हल्काफुल्का वर्षा र केही स्थानमा हिमपातको सम्भावना रहेको जनाएको छ।
महाशाखाका अनुसार, कोशी, मधेश, बागमती र गण्डकी प्रदेशका पहाडी भेगका थोरै ठाउँमा मेघगर्जनसहित हल्का वर्षा हुनसक्छ भने अन्य प्रदेशमा पनि एक-दुई ठाउँमा मौसम बदली रहने सम्भावना छ। साथै, कोशी, बागमती र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हिमपातसमेत हुनसक्ने अनुमान गरिएको छ।
यद्यपि देशका अधिकांश भूभागमा अहिलेको मौसम सामान्य र सफा रहेको जनाइएको छ। मौसमको यो मिश्रित रूपले नयाँ वर्षको बाहिरी उत्सवमा केही असर पार्न सक्ने भए पनि अधिकांश स्थानमा सामान्य गतिविधि चल्ने अनुमान गरिएको छ।
